Hip hop la tawh Pasian phatna leh biakpiakna te Pasian in a sang thei mah ding hiam?
Hih a tung a dot na tawh ki sai in nung deuh in FGA International ah Sia David Lah leh Pastor Mattheus te tawh FGAI pawl pi te in Conference leh Revival sang khak sung a ding in sang hon kik ma khang no te gupngah na ding deih na leh suah tak na ding deih na tawh August 26, 2023 ni, a ni nih ni Day 2 ni in worship ki pat na in a neih uh khang no te pawl khat in Hip hop la tawh nasia tak leh siam tak in Pasian a phat na uh tung tawng pan in ih ngah khiat dotna khat a hihi. Hih pen a tom in ki la in ki gen ngei ngai tek hi ei muh dan tek ki gen in social media ah hong tam zei zai peuh mah hi.
Nang koi ci bang in na sang hiam? Hip hop tawh Pasian biakna Pasian phatna te pen Pasian in sang thei ding na um hiam? Sang thei ding na up mawh leh bang hang in sang thei ding? Sang thei lo ding na up mawh leh bang hang in sang theilo ding cih ki kum suk ding hi hang.
A masa pen in Pasian in a sang theih biak piak na ih cih ki kum ma sa ni. Piancil a lian 4 sung ah mi masa a hi Adam leh Eve te tate Cain leh Abel te in Pasian biakpiak na hong nei uh aa, Cain in a ma khawh sa pan a ngah meh teh meh gah tawh Pasian biakna hong nei hi. Abel in zong a mah in a khawi tuu te sung pan in a ta cil a lim ci a sak penpen tawh Pasian biak na hong nei uh hi. Pasian in Cain biakpiak na te thu sim lo in Abel biakpiak na te na thu sim hi ci in Laisiangtho tung tawn in ih mu thei hi.
Tua leh Cain biakpiak na Pasian in sang lo aa, Abel biakpiakna thusim hiam cih ih et suk ciang in, pawl khat te in mehteh mehgah tawh a piak na hang leh gam hing tawh si ki tak a, a piak na uh tua hang hi ding hi a ci zong pawl khat om hi. Laisiangtho sung ih sim phat ciang in nang zong lim tak in hih le cin hong ki sang lo ding sa na hi hiam? ci in Pasian in gen hi. Ih gen nop thu in lim tak a Pasian ih biak ih siam tawp ih hih theih tawp a hih nak leh Pasian in sang thei hi Pasian pen a pua lam sang in lung sim tawng a en ih Pasian a hih na Laisiangtho mun tam pi ah ki mu theih hi.
Tua a hih leh Hip Hop, Rap, Rock cih la nam tuam tuam te tawh Zola pi tawh ee Pasian phatna biakpiakna te ee Pasian in sang thei ding in na um hiam. Khat leh khat bel ih ngaih sut na ki bang lo kha mah ding hi, kei mimal muh na ah bel a lung sim tak pi leh thumaan thu thak tawh Pasian a bia a hih nak a leh bang la bang la tawh hi ta leh lung sim tawng pan a biak uh lim tak a piak uh a hih nak a leh Pasian in sang ding ka um hi.
Tua ban ah tu hun khangno te la hoih sak leh a mau deih dan te ni dang a khang lui te la deih dan ki bang thei het lo hi. Pawl khat te in Hymn mah Pasian sathau nilh hi a ci om in pawl khat in Contemporary music te tu lai tak ih zat praise and worship ih cih te Pasian in sathau nilh deuh hi a ci om hi. Bang la bang la hi ta leh en ih lung sim tawng tawh Pasian a bia ih hih nak a leh Pasian in hong sang ding cih ka um hi. A hi zong in hih pen Pasian in sang ding sang lo ding cih a thu khen ding pen Pasian bek a hihi. Ei Pasian mun ah thu khen a ih om nop pah pah pen dah huai zaw kan hi. Lusifer pan in Satan hong pian na in Pasian tawh ki bat nop na ki phat sak na lung sim pan hong ki pan na hi zaw hi. Khasiangtho in ei leh ei ih mawhna hong ki phawk sak aa, mite mawh na bek bek ih muh theih den leh pen ngaih sut huai ding hi. Zeisu a nei mah ka hiam KST ka sung ah hong teeng tak pi hiam cih ki sit phat huai ding in ka um hi.
A tawpna leh ka thu khup na ding in tutung ih buai pih ngei ngai Hip Hop tawh Pasian biak na tawh ki sai in kei mimal muhna ah ken ka pak ta mahmah hi, siam zong sa peuh mah ing ki lim sin mahmah ding uh leh a siam tawp uh tawh Pasian phatna a nei uh a hih man in ka pak ta peuh mah zaw sop hi. Tu hun USA ah khang no te biak inn zong a tung zo lo tampi kawm kal ah hih bang in Pasian sung nuam sa in, Biak inn ah nuam sa, ki kholh khop na ki pawl khop na te nuam sa ziah ziah uh in, International level in Pasian phat na nei cih ka muh ciang in ei Zomi te Pasian in a mah biakpiak na ah a dawn lam ah hong koih, mite mai ah hong tai sak cih ka muh ciang in ka ang tang peuh mah hi. ( Next Generation Planetshakers Team dan in mu ing). A makai te zong Pasian in zang mahmah in ei Zomi bek lo Kawl gam bup ai tang phial in Pasian in hong zat te hi ci in ka ang tang peuh mah hi. Khangno te makaih siam ka sa diak hi.
Behlap na in ah Pasian in lung sim tawng a en Pasian a hihi . Limtak a a hih te biakna a sang ih Pasian a hihi. Pasian in ih biakpiak na hong san ding leh hong san loh ding pen Pasian bek thu khen ding a hih man in ei leh ei thu ki khen khen pen a ki sam khat om ka sa hi. Ih Zomi sung ah a madawk pian khat hong om ciang in gen siat ding mawh zon ding lam ki hat zaw in ki pah tawi ding ki dom sang ding cih lam sang in ki leh kaih kaih ding pen mi hing lung sim ngei na khat zong a hihi. Zomi te a ki pah tawi siam ding in Topa'n thupha hong pia ta hen.
Lungsim tawh a ki tuah kei leh comment ah ki kum suk lai ni ee maw
Lungdam lai nong sim sak tang tang man in
Lai at: Tedim Times Editor Pu LT Tha Cin
Ih website zong ki follow thei hi ven