Rih Bualpi a hih kei le Tuili
Rih Bual Tangthu leh Rih Tuili Thu cih nam nih om in a nih in hih mun ah sim theih ding in kong koih khia uh hi.
Rih Bualpi Tangthu
AD 1520 Kum kiimlai in Pu Penglamte Pu Ngamtawnte Lennupa leh Lentang dung Rih kiim ah na khang khia uh hi. Tua hun lai-in Rih Bual ngak Pu leh Pite tawh na khangkhia khawm uh hi ci-in Mar tangthu uk Pu Lal Zara in na gen hi ci-in Pu Zuala in hong gen ngei hi. Rih Bual pen lamdang mahmah in khaguk sung tuisiang in khaguk sung buantui bang in san hi. atungah nin khat zong aom thei lodingin Phialphiah in cingin kem hi. Tuk lai takin Rihtui siangin cim mahmah a, khuadam hun in Rih tui nin mahmah hi.
Rih Bual pen Lungtang tawh ki bangin akiim azai na pen taai thum pha hi. Athuk na pii Sawmguk kiim pha hi. Asung pen Siikbeel bang hi. Tulai takin akiim-ah Mizo gam pan Kawlgam pan Gamdang tuamtuam pan in hong ki en hi. Hoih ki sa mahmah in atungah mite nop takin kisil in tuni dong kua mah zong tui kia lo hi. A Simmawhte bel nungta lo uh hi.
Rih Bual pen Falam township sung hi a, A kiim ah Mizote tengin Zomi gam tangthu sungah Mizo gam a, Rih Bual Lian pen Burma gam ah om hi ci uh hi. Rih Bual pen Tedim panin Taai Sawmthum leh taai sagih pha hi. Rih Bual gei ah Rih Khuadaal khua om-in 2004 kum aki pan Kawl kumpi in Myo hong piak sak ta hi.
Pu Kawm Zing in Rih kiimah Sa na bengin Lo na kho ngei hi. Rih Bual ngak Pu leh Pi te tawh na ki thuah uh a, amaute zong mihingte tungah na thu nuam mahmah uh hi. Pu Kawm Zing Rih nungak melhoih mahmah khat Pi Zing Par tawh hong ki ngai uh a, na ki teng uh hi. Pu Kawm Zing pen na zawng mahmah ahih manin a sunghte in Leibeel hong bawl in la tua tawh na deih bangbang hong ngen in na ci uh hi. Pu Kawm Zing leh Pi Zing Par in tapa khat na nei uh a, amin dingin Kawm na phuak uh hi.
Pu Kawm Zing te in Gan deih ahih manin a sunghte kiang ah Sial, Bawng, Sakol leh Ak cihte Leibeel tawh pai in na nget uh hi. Tua pan in Pu Kawm Zing te Rih Khua ah mihau leh innpi in na om uh hi. Tua thu khua leh tui in atheih uh ciangin Rih ah Leibeel tawh pai in adeih bangbang uh na ngen uh hi. Rih Ngak Pu leh Pi te kiangah Gan a nget uh ciangin Sial adeih uh Leibeel khat leh Sial Khau na keng uh a, tua Leibeel pen Tui nawn-ah koih in tua Sial khau pen Singbul ah khiah in Mual pang lamah pai san uh hi. Cih ciang hong kipia tua ci-in aet sim te ki pia lo hi. Ahi zongin Mual pang lamah ngak le uh Sialte akhau ah kaih lian dingin na koih sak uh hi ci-in Leisan khua Pu Lal Roa Liana in na gen hi.
Pu Kawm suanlekhak te pen tuni ciang dong Kawmmi ci-in pai suak uh hi. Tua Kawmmite pen pil in Bum leh Ai siamte hi ci-in tanglai pek panin tuni dong ki thei hi. Kawmmi te tuhun ciang in Mizo Ram leh Manipur gamte ah teng ta uh hi.
Tanglai in Sa kikap liamten Rih Bual sung na zuan uh hi. AD 1700 kum kiim lai-in Hual Ngo ( Gual Ngo ) Pi Vul Thangi meigong khat in Leibeel kitam khat tawh Ak ngen a, tua hun panin tua ni dong Rih Bual panin bang mah ki nget thei nawnlo hi.
AD 1940 kum in Mikang Bitist kumpi Galkap Mangpa General Kalvin leh alawmte Rih kiim ah buty in na om uh a, Rih Bual pen na lunglut mahmah hi. Tui et na tawh a et ciangin Daimon, Shwe, Ngun leh Suang man pha tuamtuam leh aman niam pen Sai-ha cih bang na mu hi. Tua ciangin Gen. Kalvin Japan tawh ki do sangin hi tui sunga om teng la in cihpih leng ki met zaw ding hi ci-in Rih sungah tua te ala dingin na ki pan hi. Galkap Navyte samin tui sungah tuak sak hi. Atuak masasa kua mah atungah kah kik nawnlo hi. Tua ciangin Maan bung sungah Oxygen tawh tuak sakin aliak kik uh ciangin amite akeugaw sa in lakhia kik uh hi. Tua ciangin Gen. Kalvin in Zomite tangtha la mihingtha 550 tawh Leisan lampang pan in heikhia ding a hong ki pan hi. A zawh kuan lam ninih bang aki sap ciangin Sun kiimlai mah in Rih sung pan Gulpi Samphek khat Van lamah hong ki khawh in phit a, tha khat thu in meilom ki zial a, nasia takin Pingpei in tua miteng Van lamah pei to mang hi. Kua mah lei tuu kik nawnlo hi ci-in Pu Lal Roa Liana Leisan na gen hi.
Tua ciangin Gen. Kalvin heh lua mahmah in Gal vanleng tawh Meepi tang sagih khiat in khat zong puak kham lo hi. Lamdang sa mahmah in Meitei gun ah ava khiat ciangin akhiat ma saksak puak kham a, Tua ciang Rih ah ki leh kik in hong khia kik uh a, ahi zong khat zong puakkham tuanlo hi. Tua pan Gen. Kalvin Zomite pasian lamdang ei, hi susu lai leng beimang ding hihang ci-in, Japan ado dingin hong ki pan kik uh hi. Hi thu pen Zomite i ki saktheih pih Rih Bual tangthu ahi hi.
Gelh - Sunmang Pu.
RIH TUILI THU
Rih tuilii hong pian khiatna tangthu pen azaknop huai tangthu mawkmawk khat bang hi. Ahizongin tua tangthu pen aman hi ci-in Zomite in tuni dongin kiptak in ki-um hi. Hih tangthu hong kipat khiatna in tuma kum 500 val, 600 kim pawlin Zomi nam sung pan Mizote atencil hun pan kipan hi. A.D-1450 kum kim aa kipanin Mizote leh Hualngote in Khamtung Zogam ah khua hongsat uh hi. Tua bangaa a om atenna pan Hausa nihna ahi; Pu Huathana uk hun sung, zan khat hausapa in mang lamdang khat hong man hi.
Tua amang matna ah a kha-mul sau mahmah aa, azahtak bang mahmah vantungmipa khat in amel kilangh in, "Kei pen khate acing vantungmi Pu Rih ka hihi. Note ii khate hongcing hongkem dingin, kei pen Sialkang in kibawl in vanlai ah kongleng aa, no omna ii nitumna gam leilulam ah munhoih khat kamu hi. Kei in tua mun ah ka om ding hi. Tua tuilii ah tua ni aa kipan kei katen mah bangin, asi khempeuh ii akhate zong pelhlo in kei kiang ah hong pai ding uh hi" ci-in gen aa tua mun pen mihingte lungtanglim lian abang, tui liipi khat in abawl hi.
Tua a mang tawh kizui in hausapa Huathana in, a galkapte tuilii a zon sak leh a ni sagih ni ciang mu hi. Tua amuh vua kipan in tua tuiliipi pen (Rihdil) Rih tuilii naci uh hi. Rih acih pen Rih vantungmipa min avawh uh hi-in, Dil acih pen Tuilii acih nopna hi. Adeihna in Rih vantungmipa omna tuilii cihna ahi hi.
RIH TUILII TAWH KISAI TANGLAI ZOMITE UPNA
Rih tuilii tawh kisai-in Zomite in mi khat asih leh tua asi ii kha pen misi khua ah apai ding lunghei neisa mah in Rih tuilii ah hong pai-in tuilii atun ciang Longlotui akici, abeisa thu amanggilh sak thei, ciktui pen dawn in, Hullo pak kici, nunglam hei nawnlohna pak bat uh hi. Tua ciang bekin asisa khate in, ataksa nuntakna manggilh pan in misi khua ah pai dingin Rih tuilii sung lungmuang takin zuansuk uh hi, ci-in um uh hi.
Tua upna tawh kizui-in tanglai Zomite in khua khal hun sim in Rih tuilii ah pai uh aa, asisate phawk na biakpiakna bawl uh hi. Tua pawite ah siampite in tuilii sung aa tui pen a khutkuak uh tawh la-in phuisam uh hi. Tua khit ciangin tuilii sungah sumtangte, pak namtuite khia uh aa, alimhoih nei singkung nuaite ah biakpiakna bawl uh hi.
RIH TUILII PI II ALAMDANNATE
Leitungbup ah khat bek a om, lungtanglim lian dan aa om bualtui lii ahi hi. A sanna pi 2960' val apha mualdung tung aa om tuilii ahi hi. Tua sang aa lamdang zawlai ah, Zogam ii khuapi ahi; Khalkha khua ah khuahun tehna, -3 degree Celsius ahih laitakin Rih tuilii sung alamdang in lum heuhau hi. Tua ban ah a lamdan penpenna ah Rih tuilii sungah luitui, hawk tuite lah luang hetlo napi, guahzukloh, vuk asah mahmah hun December kha leh January kha kipat hun pawlin Rih tui pen amathu in nakpi takin niin thei hi. Tui lii en aa pai, mi pawl khatte in Rih liitui la in a innvuah thawl tawh keng thei uh aa, Rih tuilii a nit hun ciangin, akikeng tuite zong amun mun ah na niin hi. Tuhun mipil pawl khatte in tui lii nuai ah leitangh sung lumna lampi khat in nawk kha hikha ding hi, ci-in um mawh hi.
RIH TUILII II ALIMPUAK LEH AOMDAN
Rih tuilii pen tai 2.5 azai mualtung aa om tuilii khat ahihi. Akimkot ah gambalte in huang umna dai/gawl bangin kigual dimdiam in po hi. Tua gambalte pen tanglai Zomite in amau upna ah Asisa khate ii huang umna dai ci uh hi. Tuilii athukna pen ahuam in pi 50' kiim bang pha aa, athuk penpenna mun pen pi 60' bang pha hi. Tui ii amel pen vanmel cik mahmah dan in dum kiuhkeuh aa, tui sungah vanbal pakkungte leh tuidol pakte amathu in po hi. Tua banah akim aa om, singkungte tungah singkung pakte pak zihziah ahih manin Rih tuilii pen khamtung gam ii tehpih omlo aetlawm mahmah mun khat ahihi.
RIH TUILII II AOMNA MUN
Rih tuilii aomna pen Kawlgam ii nitumna leilulam aa om Khamtung Zogam ii leilulam mong ah om hi. Adiak in India leh Kawlgam gamgi tawh kinai hi. Gamgi tawh tainih bek kihal hi. India gam Champhai tawh tai (15) kigamla-in, Aizawl tawh tai (130)
kigamla hi. Tua ahih manin tuilii a en ding aa pai pen India lampan tamzaw hi. Kawlgam lam pan apaite in Zogam lutna kongpi akici phial ahi, Kawlpi(Kalay) panin kipai hi. Kawlpi pan tai (60) kim agamla Tedim khuapi kinawk in Tedim pan tai (32) kigamla hi. Kawlgam pan ih pai aa, India gam pan ihpai zongin asanna pi 4000'-5000' apha mualte kinawkkha hamtang hi. Tua ahih manin Rih tuilii en dingin mivom, mikang akipai tek hangin India gammite limpaipen uh hi.
Amau hong paina uh ahangin asisa, apu apa te ii kha te zong Rih tuiliipi sungah pai hi cih upna khat tawh athupit bawlna mun khat uh ahihman zong ahi hi. Ahi zong tuhun ciangin Rih tuiliipi sungah gualnop bawlna gunkuangte tuantheih dinglah om in, giah nading zinbuk(hotel)te zong om ahih manin mi tampi in gualnop bawlna-in kipai tek aa, nopci mahmah ta hi.
RIH TUILII TAWH AKISAI THUTUAMTUAMTE
Rih tuilii gei ah amin kivawh/phuah hun lian a kitello hang tuni dongin akilo lai ahi, sai bualna akom/kuak leh sai lutlutna mual cihte zong omlai hi. Tuilii kimkot aa om, leilet/zanglei te akitawh cil A.D 1942-1950 kum hun pawlin sai hapakte kimu zelzel theilai ahih manin tanglai hun in saihonte ii gamtatna, sihna mun (Saite ii Han) hi ci-in zong kiciamteh hi.
Hih saite ii sihna (sai han) ahihlam athei Meitei te mihaupa khatin sai hapak adeihmanin a nasem tampi atullom aa sim, sam in Rih tuilii sung aa tuite tuilam bawlin khekhia hi. Tui alangkim khawng akiam ciangin asisate kha acing, vantungmi ii abawl gulpi samnei nupa kop khat, tuisung pan hong kilanghkhia uh aa, huih leh guah kipei in gialpi kia aa, mivom nasemte lau-in a taimang uh hi. Pawl khatte si-in, pawl khatte liam hi. Asilote zong a sam teng uh pulh gaizah dongin aci uh na hi.
Rih tuilii ii leitaw lam ah mivom nasemte ii nasepna, lui/hawk guampi zong tuni dongin omlai hi. Mite in zahtak tak aa, abiak uh vantungmite tuikhuk pen thukan lopi in, susia/bawlsia kha uh ahih manin dipkua uh aa, kumsim, khuakhal hunsim in tua mun ah biakpiakna bawl den uh hi. Tua mun ah atonpih, asiampite un, tuikhuk sung aa tui pen phuisam in tuikhuk sung ah sumtangte leh paknamtui te khia-in akim aa singlim nuaite ah biakpiakna bawlzel uh hi.
Tuilii alamdanna ah amathu in lungtanglim tawh kibang hi. Tuilii kim ah khuamite in nidang aa misi khate huang umna akici gambalkungte po zihziah hi. Nidang hunin Rih tuilii kiim aa om khuamite in mi asih ciangin misi om hi cilo in Rih tuilii ah pai hi, ci uh hi. Rih tuilii pen lamdang mahmah aa, asungah ninthel, nahteh omlo hi. Nidang hun in a sungah nin om kha a om leh gam phialphiahte in tawm in hah uh hi, ci-uh hi. Tua ahih manin Rih tuilii pen siangtho den hi. Tuikhang, tuikiam cih bang om ngeilo hi.
Tuhun ciangin India gam pan hita leh Kawl gam lam pan hita leh mawtawpi, mawtawneu nuamtak in tai ziahziah ta aa, gualnopna bawl ding leh thukan in mi tampite kipai ziahziah theita hi. Kawlgam lam panin, Kalay(Kawlpi), Tedim, Laitui, Rih ciang tai (90) kigamla aa, nikhat thu in nuamtak in kitung thei hi. Tedim pan tai (14) agam latna aa om ahi Laitui khua pen, AD 1874 kum pawlin kisat aa, tuin inn (800) val bangpha in khuapi lian khat in omta hi. Laitui khua pen Sakol(La) - (500)val bang omna khuapi khat ahihi. Tuipi maitang pan asanna, pi 4950' pha hi. Laitui khua pan in tai (16) agamlatna ah Rih tuilii om hi. Nidang hun in Laitui pan sakol tungtuang in Rih tuilii ah thu kanin kipai hi. Tuhun ciangin mawtaw, cycle tawh nuamtakin kipai theita hi.
By: ZOMI Group (ဇိုမီး)
* Hih thute;- လေဆာ၊ ကျန်းမာရေး ရေချိုးဆပ်ပြာ ဂျယ်လ်ခရင်မ် te kaikhopna pan akiteisawn ahihi.
Crd/Source: A(67) veina Gambup Laisang kumcin kikhoppi ciaptehna laibu, Rih Khuadar, 2015.
Laipian,laibu saal
