Tuilampi a mukhia pa Christian te khat na hi kha
Leitung i 70% tui in tuam hi. Lei maitang seh 3 suah seh 2 pen tuipi ahi hi. Tua pen 224 million square kilometres zai hi. Pacific Ocean, Arctic Ocean, Indian Ocean le Atlantic Ocean kici tuipi lian mahmah te lakpan Pacific Ocean sunga Marianas Trench a kicihna mun a thuk penin kiciamteh-a, Everest Mual a bupin kiphum zo ding kici hi. Hih zaha a zai le a thuk tuipi hangin mihingte nuntak khuasakzia leh kikawm kiphaknate khangto tuam mahmah hi. Tua hi-a tuipi thu a thei nuamte a dingin tuipi thu sinna "oceanography" kici subject khat bang om hel hi. Modern Oceanography a phuankhia pa, "Pathfinder of the Seas" (tuipite tunga lampi mukhia pa), "Scientist of the sea," a kici pa thu ka simna pan ka muhkhiat thu kong gen ding hi.
Ama min Matthew Fontaine Maury (1806-1873) hi a, American te ahi hi (a pute uh France pan). A Pu Rev James Maury pen US te President 3na pa, USA phut pupite khat ahi Thomas Jefferson a na pantah Pastor pa ahihi. A pu a pa khang ua kipan Pasian a zahtak Christian hoih mahmah gui na hi uh hi.
Kum 19 a phakin United States Navy ah luta, za khang toto hi. America ah tualgal hong om ciangin Confederacy lamah lut hi. Tuipi thu kan cih takin kan hi. Tuipi tunga huih nunzia, tuihual omzia akipan tuipi maitang le tuipi sung dong kan cih takin kan den hi. 1855 kumin "The Physical Geography of the Sea" kici tuipi thu tawh kisai laibu khat gelhkhia hi. Tuipi tawh kisai thu kicing pen, laibu masa pen hong suak hi.
Ama hun lai a US President a sem John Quincy Adams (1767-1848) tawh ki-it mahmah uhhi. Piangthak tuak uh ahi manin kithutuak mahmah uha United States Naval Observatory hong phuankhia uhhi. USNO ah Maury in Superintendent sem hi. United States Naval Academy hong piankhiatna pupi hi lai hi. American Association for the Advancement of Science kici kipawlna zong ama hang mahin 1848 kumin hong piangkhia hi. Mipil mahmah te bek a kipawlna American Philosophical Society ah zong 1852 kumin kihel hi.
Tuipi thu ah US bek hi loin leitungbup a phattuam nading pilna tampi hong suahkhia Maury pen Christian khat a na hihna, mi piangthak khat a na hihna le Laisiangtho nuntakpih-in, Pasian a muan manmahna thute ka theih ciangin tha ka ngah mahmah hi.
Ama bulphuh LST mun Psalm 8 ahi hi. "... You have given him dominion over the works of your hands... whatever passes along the paths of the sea..."
Lai at Sia Nang Za Thawn